Mashala Tech Co.,Ltd အမည်ရှိ Online ချေးငွေလုပ်ငန်းဖြင့် အများပြည်သူများထံမှ ဂုတ်သွေးစုပ်ငွေကြေးအမြတ်ထုတ် လိမ်လည်လုပ်ကိုင်နေသည့်အဖွဲ့အား ဖမ်းဆီးရမိ

   ရန်ကုန်တိုင်းဒေသကြီး၊ လှိုင်သာယာ(အနောက်ပိုင်း) မြို့နယ်၊ (၉) ရပ်ကွက်၊ နတ်မောက်လမ်း၊ အမှတ်(၄၅၈/က)၌နေထိုင်သူ မဆုရည်နွယ်(ဘ)ဦးဝင်းဦးသည် အွန်လိုင်းချေးငွေကိစ္စ ရပ်များနှင့်ပတ်သက်၍ ဖုန်းဆက်ခြိမ်းခြောက်ကာ ငွေကြေးတောင်းခံမှုများ ပြုလုပ်နေကြောင်း သိရှိရသဖြင့် ဖေဖော်ဝါရီ လ ၁၅ ရက်တွင် ၎င်းအားလိုအပ်သည့် စစ်ဆေးဖော်ထုတ်မှုများ ဆောင်ရွက်ခဲ့ရာ ၎င်းသည် ၂၀၂၃ ခုနှစ်၊ ဇန်နဝါရီလခန့်တွင် TikTok လူမှုကွန်ရက်စာမျက်နှာမှ တွေ့ရှိသည့် Mashala Tech CO.,Ltd အမည်ရှိ အွန်လိုင်းချေးငွေဝန်ဆောင်မှုလုပ်ငန်း၊ Team – A တွင် ချေးငွေကောက်ခံသူအဖြစ် တစ်လလျှင် လစာ ၃၂၀,၀၀၀ ကျပ်ဖြင့် စတင်ဝင်ရောက်ခဲ့ကြောင်း သိရှိရပါသည်။

စိစစ်ဖော်ထုတ်ချက်များအရ-

• Mashala Tech CO.,Ltd အား ဦးဇေယျာမင်း (ဘ) ဦးအောင်မင်း တစ်ဦးတည်းအမည်ဖြင့် မှတ်ပုံတင်ထားသော်လည်း အမှန်တကယ်လုပ်ငန်းလုပ်ကိုင်နေသူမှာ တရုတ်နိုင်ငံသား Mr. Yu Linfeng (ခ) Willian ဖြစ်ကာ ဗိုလ်တထောင်မြို့နယ်၊ ကမ်းနားလမ်းတွင် ဖွင့်လှစ်ထားရပြီး ၎င်းသည် ဇန်နဝါရီလ ၅ ရက်၌ ကမ္ဘောဒီးယားနိုင်ငံသို့ ထွက်ခွာသွားရာမှ မြန်မာနိုင်ငံသို့ ပြန်လည်ဝင်ရောက်ခြင်းမရှိသေးကြောင်း။

• ဖမ်းဆီးရမိပြီးဖြစ်သည့် HR ဝန်ထမ်းဖြစ်သူ မြတ်စန္ဒာဝင်း၊ Assistant HR ဝန်ထမ်းများဖြစ်သူ ဖမ်းဆီးရမိပြီးဖြစ်သည့် မမို့မို့အောင်နှင့် ဖမ်းဆီးရန်ကျန် ကျော်မင်းဖြိုးတို့က ကြီးကြပ်လုပ်ကိုင်လျက်ရှိကြောင်း၊ ၎င်းတို့၏ ကြီးကြပ်မှု အောက်တွင် အွန်လိုင်း ချေးငွေများရယူလာစေရေး ဆွဲဆောင်သည့်အဖွဲ့၊ ချေးငွေ Application Download ပြုလုပ်ရန် ခိုင်းစေသည့်အဖွဲ့၊ ချေးငွေလျှောက်လွှာ စိစစ်သည့် အဖွဲ့နှင့် ချေးငွေပြန်လည် ခြိမ်းခြောက်တောင်းခံသည့် အဖွဲ့ဟူ၍ အဖွဲ့ ၄ ဖွဲ့ခွဲကာ လုပ်ကိုင်လျက်ရှိကြောင်း။

• ချေးငွေပြန်လည်ခြိမ်း ခြောက်တောင်းခံသည့် အဖွဲ့ကို Team A, E, J, N, S, X အဖွဲ့ ၆ ဖွဲ့ ခွဲထားပြီး စုစုပေါင်း ၉၁ ဦး တို့ဖြင့် ဖွဲ့စည်းထားကြောင်း။

• Mashala Tech CO.,Ltd ကုမ္ပဏီအနေဖြင့်  Morning Cash ၊  Smile Loan ၊  Cash Loop ၊ WA Wallet ၊ PK Cash ၊ AJ Cash ၊ Morning Wallet ၊ Sky Cash ၊ Happy Cash ၊ Sun Bag ၊ Zuri Loan နှင့် Quick Cash စသည့် ချေးငွေ Application များအား အများပြည်သူမြင်သာနိုင်ရန် Wave Money Application တွင် ထည့်သွင်း ကြော်ငြာခြင်းများကို လုပ်ဆောင်လျက်ရှိပြီး ချေးငွေရယူလိုသူများအနေဖြင့် အဆိုပါ Application များကို Download ပြုလုပ်၍ ဖုန်းအတွင်း Install ပြုလုပ်ပြီးပါက Register ပြုလုပ်ရန်အတွက် ချေးငွေပုံစံဖြည့်သွင်းရာတွင် အမည်၊ ဓာတ်ပုံ၊ ဖုန်းနံပါတ်၊ ငွေလက်ခံမည့် KBZ Pay/Wave Pay အကောင့်များ၊ နိုင်ငံသား စိစစ်ရေးကတ် (ရှေ့/နောက်)ဓာတ်ပုံနှင့် Gmail တို့ကို ဖြည့်သွင်းပေးရကြောင်း။

• ဖုန်းတွင် Permission Access တောင်းခံပြီး ချေးယူလိုသူက Allow ပြုလုပ်ပါက Gmail ချိတ်ဆက်ထားသည့် ဖုန်း Contact များအားလုံးကို Application က တရားမဝင် ရရှိသွားပြီးနောက် ချေးငွေရယူလိုသူများထံ ချေးယူမည့် ငွေပမာဏ၏ ၃၀ ရာခိုင်နှုန်းကို အတိုးဖြတ်တောက်၍ KBZ Pay/ Wave Pay မှတစ်ဆင့် လွှဲပြောင်းပေးပြီး အနည်းဆုံး ငွေ ၃၀,၀၀၀ ကျပ်မှ အများဆုံး ငွေ ၃၀၀,၀၀၀ ကျပ် အထိချေးပေးကြောင်း။

• ထို့နောက် ချေးယူငွေများအား တစ်ပတ်အတွင်း ပြန်လည်ပေးဆပ်စေပြီး ကုမ္ပဏီဝန်ထမ်းများအနေဖြင့် ချေးငွေရယူထားသူများအား ဖုန်းဖြင့်ခေါ်ဆိုခြင်း၊ Viber သို့မဟုတ် SMS မှတစ်ဆင့် ချေးငွေပေးဆပ်ရန် ဆက်သွယ်တောင်းဆိုခြင်းများ ပြုလုပ်ကြောင်း။

• ချေးငွေပြန်လည်ပေးဆပ်ခြင်းမရှိသူများနှင့် ၎င်းဖုန်းအတွင်းမှ Contact Person များကို ဖုန်းဖြင့် ဆက်သွယ်၍ ဆဲဆိုခြင်း၊ ခြိမ်းခြောက်ခြင်းများ ပြုလုပ်သည့်အပြင် လူမှုကွန်ရက်စာမျက်နှာများတွင် အရှက်တကွဲဖြစ်စေရန် ခြိမ်းခြောက်ပြောဆိုခြင်းများ ပြုလုပ်ကြောင်း ဖော်ထုတ်သိရှိရပါသည်။

ဖမ်းဆီးရန်ကျန် တရုတ်နိုင်ငံသားဖြစ်သူ Mr.Yu Linfeng(ခ) Willian နှင့် ဖမ်းဆီးရမိသူများဖြစ်သည့် မမြတ်စန္ဒာဝင်း(ခ)စန္ဒာ၊ မအေးမြင့်သူ(ခ)ဇူးဇူးကို၊ ဆုရည်နွယ်၊ မဝေဖြိုးသွယ်(ခ)မဝေ၊ မင်းခန့်ကျော်၊ ဇော်ထက်အောင်၊ ကျော်ဇင်ထက်၊ မရတနာ၊ မလွင်မေချစ်၊ ရဲနိုင်ဝင်း၊ မမို့မို့အောင်၊ မင်းခန့်ကျော်(ခ)ခန့်ကျော်၊ ငြိမ်းချမ်းဆွေနှင့် မစုစုအေးတို့အား ၎င်းတို့လိမ်လည်ရာတွင် အသုံးပြုသည့် ပစ္စည်းများဖြစ်သည့် Laptop ၁၃၃ လုံး၊ လက်ကိုင်ဖုန်း ၁၀ လုံး၊ မော်တော်ယာဉ် ၁ စီးတို့နှင့်အတူ ဖမ်းဆီးရမိခဲ့ပြီး ၎င်းတို့အားအမှုဖွင့်လှစ်၍ တရားဥပဒေနှင့်အညီ အရေးယူမှုများ ဆောင်ရွက်လျက်ရှိပါသည်။

မိဘပြည်သူများအနေဖြင့် ငွေကြေးလိမ်လည်မှုများပပျောက်စေရေးအတွက် မိမိတို့ပတ်ဝန်းကျင်တွင် အထက်ပါဖြစ်စဉ်များကဲ့သို့ ငွေကြေးနှင့်ပတ်သက်သည့် မသင်္ကာဖွယ်ရာအပြုအမူများနှင့် လိမ်လည်မှုဆောင်ရွက်နေသည်ဟု ယူဆရမှုများအား တွေ့ရှိရပါက တာဝန်ရှိသူများထံသို့ အမြန်ဆုံး အကြောင်းကြားခြင်းဖြင့် ပူးပေါင်းပါဝင်တိုက်ဖျက်နိုင်ကြပါရန်နှင့် ငွေကြေးလိမ်လည်မှုဖြစ်စဉ်များနှင့်ပတ်သက်၍ သတိပြုနိုင်စေရေး သတင်းထုတ်ပြန်ထားကြောင်း သိရှိရပါသည်။       

သတင်းရင်းမြစ်။ (မြဝတီသတင်းစာ ၂၄-၂-၂၀၂၄)

• Mashala Tech CO.,Ltd အမည်ရှိ Online ချေးငွေလုပ်ငန်းဖြင့် အများပြည်သူများထံမှ ဂုတ်သွေးစုပ်ငွေကြေးအမြတ်ထုတ် လိမ်လည်လုပ်ကိုင်နေသည့် မမြတ်စန္ဒာဝင်းအပါအဝင် စုစုပေါင်းတရားခံ ၁၃ ဦးအား ၎င်းတို့လိမ်လည်ရာတွင် အသုံးပြုသည့်ပစ္စည်းများဖြစ်သည့် Laptop ၁၃၃ လုံး၊ လက်ကိုင်ဖုန်း ၁၀ လုံး၊ မော်တော်ယာဉ် ၁ စီးတို့နှင့်အတူ ဖမ်းဆီးရမိခဲ့။