ပါတီစုံဒီမိုကရေစီအထွေထွေရွေးကောက်ပွဲကျင်းပရန်အတွက် ဧရာဝတီတိုင်းဒေသကြီးတွင် မြန်မာအီလက်ထရောနစ်မဲပေးစက်ဖြင့် လက်တွေ့သရုပ်ပြစမ်းသပ်မဲပေးခြင်းများဆောင်ရွက်

     ပြည်ထောင်စုရွေးကောက်ပွဲကော်မရှင်သည် ပါတီစုံဒီမိုကရေစီအထွေထွေရွေးကောက်ပွဲကျင်းပရန်အတွက် Myanmar Electronic Voting Machine (MEVM) စက်ဖြင့် လက်တွေ့စမ်းသပ်မဲပေးလေ့လာခြင်းအသိပညာပေးလုပ်ငန်းများကို ဆောင်ရွက်လျက်ရှိရာ နိုင်ငံရေးပါတီများ၊ ဝန်ကြီးဌာနများ၊ နေပြည်တော်ကောင်စီနယ်မြေ၊ ရန်ကုန်တိုင်းဒေသကြီးနှင့် မန္တလေးတိုင်းဒေသကြီးတို့တွင် ဆောင်ရွက်ခဲ့ပြီးဖြစ်ပါသည်။

ဧရာဝတီတိုင်းဒေသကြီးအတွင်းရှိ မြို့နယ်များတွင်လည်း ၂၀၂၄ ခုနှစ်၊ ဖေဖော်ဝါရီလ ၇ ရက်မှ စတင်၍ ဆက်လက်ဆောင်ရွက်လျက်ရှိပါသည်။

• ဖေဖော်ဝါရီလ ၇ ရက်မှ ၁၃ ရက်အထိ အနောက်တောင်တိုင်းစစ်ဌာနချုပ်ရှိ အရာရှိ၊ စစ်သည်၊ မိသားစုဝင်များနှင့် ဧရာဝတီတိုင်းဒေသကြီးအတွင်းရှိ ပုသိမ်၊ သာပေါင်း၊ အိမ်မဲ၊ ငပုတော၊ ဝါးခယ်မ၊ ကန်ကြီးထောင့်၊ လပွတ္တာ၊ ကျုံပျော်နှင့် မော်လမြိုင်ကျွန်းမြို့နယ် စသည့် ၉ မြို့နယ်၌ မဲဆန္ဒရှင်ပြည်သူ ၅,၄၅၄ ဦးတို့က စမ်းသပ်မဲပေးခဲ့။
• ဖေဖော်ဝါရီလ ၁၄ ရက်မှ ၂၀ ရက်အထိ ဧရာဝတီတိုင်းဒေသကြီးအတွင်းရှိ ကျောင်းကုန်း၊ ဖျာပုံ၊ ရေကြည်၊ ဘိုကလေး၊ ဇလွန်၊ ဒေးဒရဲ၊ ဟင်္သာတ၊ ကျိုက်လတ်၊ လေးမျက်နှာ၊ မအူပင်၊ အင်္ဂပူ၊ ညောင်တုန်း၊ မြန်အောင်နှင့် ပန်းတနော်မြို့နယ်စသည့် ၁၄ မြို့နယ်၌ မဲဆန္ဒရှင်ပြည်သူစုစုပေါင်း ၈,၁၈၄ ဦးတို့က စမ်းသပ်မဲပေးခဲ့ကြရာ မဲဆန္ဒရှင်ပြည်သူစုစုပေါင်း ၁၃,၆၃၈ ဦးတို့က စမ်းသပ်မဲပေးခဲ့ပြီးဖြစ်။

ထိုသို့ဆောင်ရွက်နေမှုများကို ပြည်ထောင်စုရွေးကောက်ပွဲကော်မရှင်မှ တာဝန်ရှိသူများက ကြည့်ရှုစစ်ဆေးခဲ့ပြီး လိုအပ်သည်များမှာကြားကာ MEVM စက်ဖြင့် စမ်းသပ်မဲပေးမှုအဆင့်ဆင့်ကို ရှင်းလင်းပြသခဲ့ကြောင်း သိရှိရပါသည်။

သတင်းရင်းမြစ်။ (မြဝတီသတင်းစာ ၂၁-၂-၂၀၂၄)

• ပြည်ထောင်စုရွေးကောက်ပွဲကော်မရှင်သည် ပါတီစုံဒီမိုကရေစီအထွေထွေရွေးကောက်ပွဲကျင်းပရန်အတွက် MEVM စက်ဖြင့် လက်တွေ့စမ်းသပ်မဲပေးခြင်းများကို ဆောင်ရွက်လျက်ရှိရာ အနောက်တောင်တိုင်းစစ်ဌာနချုပ်ရှိ အရာရှိ၊ စစ်သည်၊ မိသားစုဝင်များနှင့် ဧရာဝတီတိုင်းဒေသကြီးအတွင်းရှိ ၂၃ မြို့နယ်တို့မှ မဲဆန္ဒရှင် ပြည်သူစုစုပေါင်း ၁၃,၆၃၈ ဦး တို့က စမ်းသပ်မဲပေးခဲ့ပြီးဖြစ်။