ပြည်ထောင်စုဝန်ကြီး ဦးမောင်မောင်အုန်း (၁၈) ကြိမ်မြောက် အာရှမီဒီယာထိပ်သီးအစည်းအဝေးတက်ရောက်

       (၁၈) ကြိမ်မြောက် အာရှမီဒီယာထိပ်သီးညီလာခံ (18^th Asia Media Summit) အား အင်ဒိုနီးရှားနိုင်ငံ၊ ဒန်ပါဆာမြို့ (ဘာလီ) ရှိ Grand Hyatt Hotel မှ Ballroom တွင် မေလ ၂၃ ရက်မှ ၂၅ ရက်အထိ ကျင်းပမည်ဖြစ်ရာ ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်း ဦးဆောင်သည့် မြန်မာကိုယ်စားလှယ်အဖွဲ့ တက်ရောက်ပြီး ပါဝင်ဆွေးနွေးခဲ့ပါသည်။

ရှေးဦးစွာ 18^th Asia Media Summit ဖွင့်ပွဲအခမ်းအနားကျင်းပရာ အင်ဒိုနီးရှားသမ္မတနိုင်ငံ ဒုတိယသမ္မတမာရွတ်အမင် (H.E K.H Ma’ Ruf Amin) ၊ အာရှ-ပစိဖိတ်ရုပ်သံလွှင့်လုပ်ငန်းများ ဖွံ့ဖြိုးတိုးတက်ရေးဗဟိုဌာန (Asia-Pacific Institute for Broadcasting Development - AIBD) ညွှန်ကြားရေးမှူး၊ အင်ဒိုနီးရှားရုပ်မြင်သံကြားနှင့် အသံလွှင့်ဌာန (TVRI) Presi-dent Director၊ ကုလသမဂ္ဂ အာရှ-ပစိဖိတ်ဒေသဆိုင်ရာ စီးပွားရေးနှင့် လူမှုရေးကော်မရှင် (UNE-SCAP) အမှုဆောင်အတွင်းရေးမှူးနှင့် ကုလသမဂ္ဂလက်ထောက်အတွင်းရေးမှူးချုပ်၊ အာဆီယံအတွင်းရေးမှူးချုပ်နှင့် AIBD ဒုတိယဥက္ကဋ္ဌတို့က နှုတ်ခွန်းဆက်စကားပြောကြားခဲ့ကြပါသည်။

ထို့နောက် ထိပ်သီးညီလာခံ၏ ဝန်ကြီးအဆင့်ဆွေးနွေးပွဲကို ကိုဗစ်-၁၉ အလွန် စီးပွားရေးပြန်လည်ထူထောင်ရာ၌ မီဒီယာ၏အခန်းကဏ္ဍ (Role of Media in Economic Recovery) ခေါင်းစဉ်ဖြင့် ကျင်းပခဲ့ရာ ဆွေးနွေးပွဲတွင် ပြည်ထောင်စုဝန်ကြီး ဦးမောင်မောင်အုန်းက-

• မြန်မာနိုင်ငံတွင် Vaccination Management Information System ကိုရေးဆွဲပြီး ပြည်သူများ၏ ကာကွယ်ဆေးထိုးမှတ်တမ်းပြုစု၍ စနစ်တကျဆောင်ရွက်ခဲ့သည့်အပြင် ကာကွယ်ဆေးထိုးလုပ်ငန်းစီမံခန့်ခွဲမှု သတင်းအချက်အလက်စနစ်ဖြင့် ရောဂါကိုထိန်းချုပ်ကာကွယ်ခြင်း၊ အသိပညာပေးလုပ်ငန်းများကိုလည်း အချိန်နှင့် တစ်ပြေးညီ ဆောင်ရွက်ခဲ့ပါကြောင်း။
• ကိုဗစ်−၁၉ ရောဂါကြောင့် ထိခိုက်ခဲ့ရသော အသေးစားနှင့် အလတ်စားစီးပွားရေးလုပ်ငန်းများ အမြန်ပြန်လည်လည်ပတ်နိုင်ရေးနှင့် ရုပ်ရှင်၊ ဂီတ၊ သဘင်၊ စာနယ်ဇင်းနှင့် မီဒီယာကဏ္ဍမှ ထိခိုက်မှုအများဆုံးဖြစ်ခဲ့သည့် လုပ်ငန်းများအတွက် သီးခြားရန်ပုံငွေထူထောင်၍ အတိုးနှုန်းသက်သာစွာဖြင့် ချေးငွေများ စိစစ်ထုတ်ချေးပေးခဲ့ပြီး ယင်းသို့ ထောက်ပံ့မှုအခြေအနေများကို အချိန်နှင့်တစ်ပြေးညီ အများပြည်သူထံသို့ ပြန်ကြားထုတ်လွှင့်ပေးခဲ့ကြောင်း။
• ပြီးခဲ့သည့် မေ ၁၄ ရက်တွင် “မိုခါ” (MOCHA) မုန်တိုင်းသည် မြန်မာနိုင်ငံ၊ ရခိုင်ကမ်းရိုးတန်းဒေသ၊ စစ်တွေမြို့အနီးမှ အမြင့်ဆုံးလေတိုက်နှုန်း တစ်နာရီလျှင် ၁၃၅ မိုင်နှုန်းဖြင့် ဖြတ်ကျော်ဝင်ရောက်တိုက်ခတ်ခဲ့ရာ မုန်တိုင်းဝင်ရောက်နိုင်ခြေရှိမှုကို ကြိုတင်တွက်ချက်သိရှိနိုင်ခဲ့ခြင်းကြောင့် ထိခိုက်မှုအနည်းဆုံးဖြင့် မုန်တိုင်းအန္တရာယ်ကို အောင်မြင်စွာကျော်လွှားနိုင်ခဲ့ကြောင်း ဆွေးနွေးပြောကြားခဲ့ပါသည်။

ဆက်လက်၍ ပြည်ထောင်စုဝန်ကြီးသည် အာရှ-ပစိဖိတ်ဒေသတွင်းနိုင်ငံများ ပြန်ကြားရေးကဏ္ဍဆိုင်ရာ ဝန်ကြီးအဆင့်အစည်းအဝေးနှင့် အိမ်ရှင်အင်ဒိုနီးရှားနိုင်ငံ၊ ပြန်ကြားရေးဌာနနှင့် AIBD တို့က ပူးပေါင်းတည်ခင်းသည့် အလုပ်သဘောနေ့လယ်စာစားပွဲသို့တက်ရောက်ခဲ့ပြီး ပြည်ထောင်စုဝန်ကြီးက မြန်မာနိုင်ငံ၌ သတင်းတု/ သတင်းမှားများထိုးနှက်မှုအန္တရာယ်ကို ဆွေးနွေးပြောကြားခဲ့ရာ AIBD မှ တာဝန်ရှိသူများနှင့် တက်ရောက်ကြသူများက နားလည်သဘောပေါက်ပြီး သတင်းမှားတိုက်ဖျက်ရေးနှင့် သတင်းမှန်ပြန်ကြားရေးတွင် ပူးပေါင်းဆောင်ရွက်သွားမည်ဖြစ်ကြောင်း ပြန် လည်ဆွေး နွေးပြောကြားခဲ့ကြပါသည်။

(၁၈) ကြိမ်မြောက်အာရှမီဒီယာ ထိပ်သီးညီလာခံ အစည်းအဝေးကို အာရှ-ပစိဖိတ်ရုပ်သံလွှင့်လုပ်ငန်းများဖွံ့ဖြိုးတိုးတက်ရေးဗဟိုဌာန (AIBD) နှင့် အင်ဒိုနီးရှား ရုပ်မြင်သံကြားဌာနတို့ ပူးပေါင်း၍ ကျင်းပပြုလုပ်ခြင်းဖြစ်ပြီး အစည်းအဝေးသို့ အာရှ-ပစိဖိတ်ဒေသတွင်းနှင့် ဒေသပြင်ပရှိ နိုင်ငံပေါင်း ၃၈ နိုင်ငံမှ သတင်းအချက်အလက်နှင့် မီဒီယာဆိုင်ရာ အကြီးအကဲများ၊ အဆင့်မြင့်အရာရှိကြီးများ၊ AIBD မှ တာဝန်ရှိသူများ၊ မီဒီယာကျွမ်းကျင်သူများ၊ မူဝါဒချမှတ်သူများနှင့် စိတ်ပါဝင်စားသူ ကိုယ်စားလှယ်ပေါင်း ၃၅၀ ခန့် တက်ရောက်ခဲ့ကြောင်းသိရှိရပါသည်။

သတင်းရင်းမြစ်။ (မြဝတီသတင်းစာ ၂၄-၅-၂၀၂၂)

• (၁၈) ကြိမ်မြောက် အာရှမီဒီယာထိပ်သီးညီလာခံ၏ ဝန်ကြီးအဆင့်ဆွေးနွေးပွဲကို ကိုဗစ်-၁၉ အလွန်စီးပွားရေး ပြန်လည်ထူထောင်ရာ၌ မီဒီယာ၏အခန်းကဏ္ဍ (Role of Media in Economic Recovery) ခေါင်းစဉ်ဖြင့် ကျင်းပခဲ့ရာ ဆွေးနွေးပွဲတွင် ပြည်ထောင်စုဝန်ကြီး ဦးမောင်မောင်အုန်းပါဝင်ဆွေးနွေးခဲ့။
• အာရှ-ပစိဖိတ်ဒေသတွင်းနိုင်ငံများ ပြန်ကြားရေးကဏ္ဍဆိုင်ရာ ဝန်ကြီးအဆင့်အစည်းအဝေးတွင် ပြည်ထောင်စုဝန်ကြီးက မြန်မာနိုင်ငံ၌ သတင်းတု/ သတင်းမှားများ ထိုးနှက်မှုအန္တရာယ်ကို ဆွေးနွေးပြောကြားခဲ့၊ AIBD မှ တာဝန်ရှိသူများနှင့် တက်ရောက်ကြသူများက နားလည် သဘောပေါက်ပြီး သတင်းမှားတိုက်ဖျက်ရေး နှင့် သတင်းမှန်ပြန်ကြားရေးတွင် ပူးပေါင်းဆောင်ရွက်သွားမည်ဖြစ်ကြောင်း ပြန်လည်ဆွေးနွေးပြောကြားခဲ့။