အကြိမ် (၄၀) မြောက် အာဆီယံစွမ်းအင်ဝန်ကြီးများ အစည်းအဝေးတွင် အာဆီယံစွမ်းအင်ကဏ္ဍဖွံ့ဖြိုးတိုးတက်ရေးဆိုင်ရာကိစ္စများဆွေးနွေး

       အကြိမ်(၄၀)မြောက် အာဆီယံစွမ်းအင်ဝန်ကြီးများ အစည်းအဝေးနှင့် ဆက်စပ်အစည်းအဝေးများ (40^th ASEAN Ministers on Energy Meeting (AMEM) and Associated Meetings) ကို ၂၀၂၂ ခုနှစ်၊ စက်တင်ဘာ ၁၅ ရက်နှင့် ၁၆ ရက်တို့တွင် ကမ္ဘောဒီးယားနိုင်ငံမှ အလှည့်ကျဥက္ကဋ္ဌအဖြစ် Video Conferencing စနစ်ဖြင့် ကြီးမှူးကျင်းပလျက်ရှိရာ အဆိုပါအစည်းအဝေးများသို့ စွမ်းအင်ဝန်ကြီးဌာန ပြည်ထောင်စုဝန်ကြီး ဦးမျိုးမြင့်ဦး တက်ရောက်ခဲ့ပါသည်။

         အာဆီယံစွမ်းအင်ဝန်ကြီးများ အစည်းအဝေးတွင်-

• အာဆီယံစွမ်းအင်ကဏ္ဍပူးပေါင်းဆောင်ရွက်မှု အစီအစဉ် ၂၀၂၁-၂၀၂၅ (ASEAN Plan of Actions for Energy Cooperation – APAEC Phase II (2021-2025)) ၏ ပူးပေါင်းဆောင်ရွက်ရေးဧရိယာများဖြစ်သော အာဆီယံဒေသတွင်း စွမ်းအင်ဖူလုံမှုရှိရေး၊
• သဘာဝဓာတ်ငွေ့ပိုက်လိုင်းကွန်ရက် တိုးချဲ့တည်ဆောက်ရေးနှင့် လျှပ်စစ်ဓာတ်အားကွန်ရက်စနစ်နှင့် ကျောက်မီးသွေးနှင့် သန့်စင်သောကျောက်မီးသွေးသုံးနည်းပညာများ အဆင့်မြှင့်တင်ရေး၊
• စွမ်းအင်အကျိုးရှိ၊ ထိရောက်စွာအသုံးချရေးနှင့် စွမ်းအင်ခြိုးခြံချွေတာရေး၊ ပြန်လည် ပြည့်ဖြိုးမြဲစွမ်းအင်အရင်းအမြစ်များ ပိုမိုတိုးမြှင့်သုံးစွဲရေး၊ စွမ်းအင်မူဝါဒ နှင့် စီမံရေးကဏ္ဍ ပိုမိုကောင်းမွန်ရေး၊
• မြို့ပြနျူကလီးယားစွမ်းအင်ဆိုင်ရာနည်းပညာနှင့် အခြေခံအဆောက်အဦများ ဖွံ့ဖြိုးတိုးတက်ရေးတို့တွင် အာဆီယံအဖွဲ့ဝင်နိုင်ငံများအကြား၊ အာဆီယံနှင့် ဆွေးနွေးဖက်နိုင်ငံ/အဖွဲ့အစည်းများအကြား ဆက်လက်ပူးပေါင်းဆောင်ရွက်မည့် အစီအမံများနှင့် လုပ်ငန်းစဉ်များကို ရင်းနှီးပွင့်လင်းစွာ ဆွေးနွေးညှိနှိုင်းခဲ့ကြပြီး အကြိမ် (၄၀) မြောက် အာဆီယံစွမ်းအင်ဝန်ကြီးများ အစည်းအဝေး၏ ပူးတွဲကြေညာစာတမ်း “The Joint Ministerial Statement (JMS) of 40^th AMEM” ကို ထုတ်ပြန်ခဲ့။

        အကြိမ် (၄၀)မြောက် အာဆီယံစွမ်းအင်ဝန်ကြီးများ အစည်းအဝေး၏ ဆက်စပ်အစည်းအဝေးများအဖြစ် အာဆီယံနှင့် အမေရိကန်စွမ်းအင်ဆိုင်ရာဝန်ကြီးများ အစည်းအဝေး၊ အာဆီယံနှင့် အပြည်ပြည်ဆိုင်ရာ ပြန်လည်ပြည့်ဖြိုးမြဲစွမ်းအင်အေဂျင်စီ အစည်းအဝေး၊ အာဆီယံနှင့်အပြည်ပြည်ဆိုင်ရာစွမ်းအင်အေဂျင်စီ အစည်းအဝေးတို့ကို တစ်ဆက်တည်း ကျင်းပခဲ့ပြီး စွမ်းအင်ကဏ္ဍပူးပေါင်းဆောင်ရွက်ရေး အစီအမံများ၊ မူဝါဒနှင့် လုပ်ငန်းစဉ်များကို ဆွေးနွေးညှိနှိုင်းခဲ့ကြပြီး 7^th ASEAN ENERGY OUT LOOK နှင့် 2^nd ASEAN RENEWABLE ENERGY (RE) OUT LOOK မူကြမ်းများကို အတည်ပြုခဲ့ကြသည်။ အဆိုပါအစည်းအဝေးများသို့ ပြည်ထောင်စုဝန်ကြီးနှင့်အတူ စွမ်းအင်ဝန်ကြီးဌာန ဒုတိယဝန်ကြီး ဦးသန့်စင်နှင့် တာဝန်ရှိပုဂ္ဂိုလ်များ တက်ရောက်ခဲ့ကြပြီး အာဆီယံအဖွဲ့ဝင်နိုင်ငံများနှင့် ဆွေးနွေးဖက်နိုင်ငံများမှ စွမ်းအင်ဆိုင်ရာဝန်ကြီးများ၊ အာဆီယံအတွင်းရေးမှူးချုပ်ရုံး၊ အာဆီယံစွမ်းအင်ဗဟိုဌာနနှင့် နိုင်ငံတကာစွမ်းအင်ဆိုင်ရာအဖွဲ့ အစည်းများမှ တာဝန်ရှိပုဂ္ဂိုလ်များ၊ ကိုယ်စားလှယ်များ တက်ရောက်ခဲ့ကြကြောင်း သိရှိရပါသည်။

သတင်းရင်းမြစ်။ (မြဝတီသတင်းစာ ၁၆-၉-၂၀၂၂)

• စွမ်းအင်ဝန်ကြီးဌာန ပြည်ထောင်စုဝန်ကြီးသည် ကမ္ဘောဒီးယားနိုင်ငံမှ အလှည့်ကျဥက္ကဋ္ဌအဖြစ် Video Conferencing စနစ်ဖြင့် ကြီးမှူးကျင်းပလျက်ရှိသည့် အကြိမ် (၄၀)မြောက် အာဆီယံစွမ်းအင်ဝန်ကြီးများ အစည်းအဝေးနှင့် ဆက်စပ်အစည်းအဝေးများကို တက်‌ရောက်ခဲ့ပြီး အာဆီယံစွမ်းအင်ကဏ္ဍဖွံ့ဖြိုးတိုးတက်ရေးဆိုင်ရာကိစ္စများကို ဆွေးနွေးညှိနှိုင်းခဲ့။