နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က ဂျပန်နိုင်ငံဝန်ကြီးချုပ် ထံသို့ ဂျပန်နိုင်ငံဝန်ကြီးချုပ်ဟောင်း Mr. Shinzo Abe သေဆုံးမှုနှင့် ပတ်သက်၍ ဝမ်းနည်းကြောင်း သဝဏ်လွှာပေးပို့

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က ဂျပန်နိုင်ငံဝန်ကြီးချုပ်ထံသို့ ဂျပန်နိုင်ငံဝန်ကြီးချုပ်ဟောင်း Mr. Shinzo Abe သေဆုံးမှုနှင့်ပတ်သက်၍ ဝမ်းနည်းကြောင်းသဝဏ်လွှာပေးပို့ထားရာ သဝဏ်လွှာအပြည့်အစုံမှာ-

အဆွေတော်

ဂျပန်နိုင်ငံ၊ ဝန်ကြီးချုပ်ဟောင်း Mr. Shinzo Abe သည် ၂၀၂၂ ခုနှစ်၊ ဇူလိုင်လ ၈ ရက် တွင် နာရာမြို့၌ သေနတ်သမားတစ်ဦး၏ လုပ်ကြံပစ်ခတ်မှုကြောင့် ကွယ်လွန်သွားသည့်သတင်းကို အံ့သြတုန်လှုပ်စွာ ကြားသိရသည့်အတွက် မိမိအနေဖြင့် လွန်စွာစိတ်မကောင်း ဖြစ်မိပါသည်။ ယင်းဆင်ခြင်တုံကင်းမဲ့ပြီး သူရဲဘောကြောင်သည့် အကြမ်းဖက်လုပ်ရပ်ကို မိမိတို့အနေဖြင့် ပြင်းထန်စွာရှုတ်ချပါသည်။

ပြည်ထောင်စုသမ္မတ မြန်မာနိုင်ငံတော်အစိုးရနှင့် ပြည်သူများကိုယ်စား၊ မိမိအနေဖြင့် အဆွေတော်ထံသို့လည်းကောင်း၊ အဆွေတော်ထံမှတစ်ဆင့် ဂျပန်အစိုးရနှင့်   Mr. Abe ၏ မိသားစုဝင်များထံသို့လည်းကောင်း အထူးဝမ်းနည်းကြေကွဲရပါကြောင်း ပြောကြားလိုပါသည်။

ဂျပန်နိုင်ငံနှင့်  ပြည်သူများအတွက် Mr. Abe ၏ စံနမူနာယူထိုက်သော ပေးဆပ်မှုများကို ဂျပန်ပြည်သူများ၏ နှလုံးသားတွင် အစဉ်အမြဲကိန်းအောင်းနေမည်ဖြစ်ပါသည်။ Mr. Abe သည် မြန်မာနိုင်ငံ၏ စစ်မှန်သော မိတ်ဆွေကောင်းနှင့် မိတ်ဆွေဟောင်းတစ်ဦးဖြစ်ပြီး ၎င်း၏နှစ်နိုင်ငံအကြား ချစ်ကြည်ရင်းနှီးမှုနှင့် မိတ်ဖက် ဆက်ဆံရေး ပိုမိုခိုင်မာစေရန် သန္နိဋ္ဌာန်ချကြိုးပမ်း ဆောင်ရွက်ခဲ့မှုများအပေါ် မြန်မာပြည်သူများအနေဖြင့် အမြဲအောက်မေ့သတိတရရှိနေမည် ဖြစ်ပါသည်။

ယခုလို ပူဆွေးသောကရောက်နေသည့်အချိန်တွင် မြန်မာပြည်သူများကလည်း ဂျပန်ပြည်သူများနှင့်အတူ ထပ်တူဝမ်းနည်း ကြေကွဲရပါသည်။

အဆွေတော်အား  အစဉ်ချစ်ကြည်အလေးထားလျက်ရှိပါကြောင်း ထပ်လောင်းဖော်ပြအပ်ပါကြောင်း ဖော်ပြထားပါသည်။

ထို့ပြင် ဂျပန်နိုင်ငံဝန်ကြီးချုပ်ဟောင်း Mr. Shinzo Abe ၏ ဇနီးဖြစ်သူ Mrs. Akie Abe ထံသို့လည်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က ဝမ်းနည်းကြောင်း သဝဏ်လွှာကို ပေးပို့ထားကြောင်း သိရှိရပါသည်။

 သတင်းရင်းမြစ်။ (မြဝတီသတင်းစာ ၉-၇-၂၀၂၂)

• ဂျပန်နိုင်ငံဝန်ကြီးချုပ်ဟောင်း Mr. Shinzo Abe သည် သေနတ်သမားတစ်ဦး၏ လုပ်ကြံပစ်ခတ်မှုကြောင့် ကွယ်လွန်သွားသည့်သတင်းကို အံ့သြတုန်လှုပ်စွာ ကြားသိရသည့်အတွက် မိမိအနေဖြင့် လွန်စွာစိတ်မကောင်းဖြစ်မိပြီး ယင်းဆင်ခြင်တုံကင်းမဲ့၍ သူရဲဘောကြောင်သည့် အကြမ်းဖက်လုပ်ရပ်ကို မိမိတို့အနေဖြင့် ပြင်းထန်စွာရှုတ်ချ။
• Mr. Abe သည် မြန်မာနိုင်ငံ၏ စစ်မှန်သော မိတ်ဆွေကောင်းနှင့် မိတ်ဆွေဟောင်းတစ်ဦးဖြစ်ပြီး ၎င်း၏နှစ်နိုင်ငံအကြား ချစ်ကြည်ရင်းနှီးမှုနှင့် မိတ်ဖက်ဆက်ဆံရေး ပိုမိုခိုင်မာစေရန် သန္နိဋ္ဌာန်ချကြိုးပမ်းဆောင်ရွက်ခဲ့မှုများအပေါ် မြန်မာပြည်သူများအနေဖြင့် အမြဲအောက်မေ့သတိတရရှိနေမည်ဖြစ်။
• ယခုလို ပူဆွေးသောက ရောက်နေသည့်အချိန်တွင် မြန်မာပြည်သူများကလည်း ဂျပန်ပြည်သူများနှင့်အတူ ထပ်တူဝမ်းနည်းကြေကွဲရပြီး အဆွေတော်အား အစဉ်ချစ်ကြည်အလေးထားလျက်ရှိ။